متأخر..لكن صح

مع اول لحظة لترشيح المدير الفنى السابق للمنتخب القومى كتبت وقلت كثيرا جدا «ده مينفعش» وشرحت الأسباب والحمد لله صدق كلامى ولم اكن افترى عليه..ودلوقتى عيب لو قلت كلمة عنه..ورغم ان قرار الإقالة تأخر منذ انتهاء كأس العالم إلا أنه صح جدا.. ربنا بيمنحنا الفرصة ورا التانية لكن الغرور ربنا يكفينا شره يقتل صاحبه وكانت الفرصة الاخيرة هى زيارة محمدصلاح فى تركيا وكانت هتخلص كل حاجة لكن اللى بيشيل قربه مخرومة عارفين بيحصله ايه ولكن الغرور منعه..لكن هانى ابوريده كبير وعاقل وناصح وفاهم وعمل الصح خد بعضه وراح تركيا وصلاح كبره ووافق يرجع المنتخب وانا واثق ان صلاح فى القعده دى مجابش سيرة «حسام حسن» خالص لأنه متربى ومحترف بجد ومتأسس صح وكبير القامة والقيمة عالميا ومحليا واقليميا وفى كل مكان والأهم معندوش غيرة من اى مخلوق لان مفيش عقدة نقص..والاهم بيحب ويعشق بلده بدون مايمثل ويخبط صدره بإيده.. ان هانى ابوريده اثبت ان الدهن فى العتاقى والخبرة والتجارب العملية والحياتيه ولم يصل الى تلك المناصب العالمية والمحلية والقارية من فراغ ولابد ان ارفع له القبعة لتعامله مع الموضوع بحنكة وحكمة السنين وبصراحة لو لم يلحق نفسه كنت سأنتقده نقدا لاذعا لكنه يستحق الثناء.. اما محمد صلاح فأنت تعرف قيمتك لدى المصريين ابناء بلدك ثم أهل الأرض جميعا ومن هذا المنطلق فمن العيب ان انصحك لانك تنصح اى حد..والآن زادك قيمتك الاخلاقية والمجتمعية والرياضية والكروية عند المصريين..وياأخى يكفينا فخرا واعتزازا بك ما فعلته فى بريطانيا العظمى بصفة عامة وفى مدينة ليفربول الكبيرة بصفة خاصة وبعدهما تركيا لتصبح ايقونة غالية عند الشعب المصرى بدون استثناء .. وربنا يزيدك حبا واحتراما وشعبية رغم انف الحاقدين .. نيجى بقى إلى على ماهر المدير الفنى الجديد والمعروف ان تدريب اندية مهما كان حجمها يختلف عن المنتخب فى كل شئ وقد كتبت عنه ان لديه بعض الثقة الزائدة حبتين عندما شاهدته وسمعت ردوده فى احد البرامج منذ شهور..وهنا أهمس فى أذنه اذا كان سيقرأ كلامى اياك والتعالى فى الكلام مع اى حد واياك والمشاكل المسببة للطرد الكثير من الملعب..ويا «ماهر» خلى بالك.. وتعلم الدرس..وربنا يوفق منتخب «أم الدنيا».