أحمد حلمي عن منى زكي بـ«طالع نازل»: «مخفتش منها بعد المسلسل.. وهي لسه متفرجتش عليه» (فيديو)

شهدت استضافة أبطال مسلسل «طالع نازل» في برنامج «الحكاية»، مع الإعلامي عمرو أديب، مداخلة طريفة من الفنان أحمد حلمي، الذي حرص على تهنئة زوجته الفنانة منى زكي بنجاح العمل، مشيدًا بأدائها وأداء باقي أبطاله، كما أشاد بالفنان حمزة دياب ومحمد شاهين، وبالكتابة والإخراج، في حديث جمع بين الإشادة والمزاح.

وبدأ أحمد حلمي حديثه بتوجيه التهنئة إلى أبطال المسلسل، قائلًا: «ألف مبروك، ألف مبروك، ألف مبروك.. مريم، أنا مش عايز بس أقول كلام كأني مشاهد، وحياة ربنا، إحنا كلنا زملاء وأنا مش بقول رأيي كواحد فاهم حاجة، أنا بقول رأيي كواحد قاعد مستمتع، بتشدني في المشاهد، وبتقبض، وبيحصل لي نفس المشاعر دي لكل الممثلين».

وأشاد حلمي بالفنان حمزة دياب، قائلًا: «حمزة الخطير، أنا حمزة باحبه من زمان قوي، من أول مسلسل كامل العدد، وأنا باحبه أوي.. وهو خلاص بقى نجم يعني مش مشروع نجم، حمزة جميل وما شاء الله عنده كاريزما عالية أوي، وممثل شاطر».

وخلال حديثه، مازح حلمي عمرو أديب بشأن شخصية «نورا» وطريقة انتقامها من «علي»، قائلًا: «يا عمرو، هو في واحدة كراجل ينفع تنتقم من راجل كده مهما حصل؟ ما كانوا زي ما دخلوا بالمعروف يخرجوا بالمعروف، هو أنت شوفت فيلم عذاب امرأة؟ دي حاضنة واحدة بالغلط! دي جابته الأرض».

وواصل حلمي حديثه عن زوجته، موضحًا أنها لا تتركه يستكمل إشادته بها عندما يتحدث عن أدائها بعد أي عمل فني أو في المنزل، قائلًا: «أنا لما باجي أقولها كده بعد أي عمل أو وهي في البيت أو كده، هي مبتخلينيش أكمل، تقولي: بس بس يا حلمي، بس اسكت بس، خلاص، وتقوم رايحة الأوضة رايحة مش عارف إيه».

وأضاف حلمي: «أنا كمشاهد قاعد أتفرج، مستمتع بأدائك، شايفك مفترية قوي»، مؤكدًا أنها تفاجئه في كل عمل جديد، وقال: «هي الحقيقة كل مرة بجد بتفاجئني بحاجات ما شاء الله يعني، بابقى مش مصدق وباتفاعل جداً، يعني هو أصعب حاجة إنك تبقى عارف الشخص اللي قدامك كويس قوي، وبعدين تلاقي نفسك نسيته، ونسيت هو مين، وتتأثر بيه، وتتأثر بمشاعره، وفعلاً فعلاً بتعيش معاه».

ولم تقتصر إشادة حلمي على منى زكي، إذ تحدث عن الفنان محمد شاهين، قائلًا: «الكلام ده برضه مش بس على منى، الكلام ده كمان الحقيقة على شاهين.. شاهين، عشرة عمر، برضه أنا باتفاجئ إن في شخص آخر في المسلسل، شخص تاني ده مش شاهين يا جماعة، ودي مش منى، والناس دي مش هما.. خد بالك إنت قاعد مع عفاريت، خد بالك بس! وحياة ربنا».

كما أشاد حلمي بالكتابة والإخراج، ووجه إشادة خاصة للمخرج هاني خليفة، قائلًا: «عايز أقول كمان، قد إيه الكتابة ذكية جدًا، وعاملة زي الدانتيل، رهيبة مش معقول حلاوة الكتابة، هاني خليفة، شهادتي فيه مجروحة، قد إيه المسلسل كده، حاجة كده ملهاش توصيف والله، يسترسل كده، وبعدين يقوم مأثر فيك، وبعدين يقوم قابض قلبك، وبعدين يفكك، وبعدين بالقليل بالقليل.. يعني أنا سعيد أوي أوي بالمسلسل ده».