أحمد السبكي: «الأفلام بتتعمل النهاردة ومحدش بيشتريها غير بعض المنصات» (فيديو)

تحدث المنتج أحمد السبكي عن أزمة تسويق وبيع الأفلام المصرية للمنصات الرقمية، وتأثير ذلك على صناعة السينما، مشيرًا إلى أن عدم بيع الفيلم رقميًا يمثل عبئًا إضافيًا على المنتج، خاصة إذا لم يحقق إيرادات في دور العرض داخل مصر أو الخليج، مؤكدًا أن عائدات المنصات أصبحت أحد مصادر تعويض تكلفة الإنتاج.

وقال السبكي في تصريحاته للمخرج عباس أبو الحسن، ضمن بودكاست «حوارات مع عباس»: «السينما بتشغل الناس، وأنت بتفتح بيوت ناس كتيرة، لما بتشتغل سينما.. لأن الفيلم وراه ناس كتير أوي وأسر كتير وكل واحد متعلق في عرقوبه أسرة صح؟ النهاردة القنوات، محدش بيشتري ديجيتال، يعني أنت بتعمل فيلم محدش بيشتريه، مفيش حد بيشتري في مصر في العالم دلوقتي غير.. غير بعض المنصات زي يانجو بلاي هي اللي بتشتري بس، ومبتشتريش أي حاجة بتنقي».

وتابع: «النهاردة في ناس كتير كانت بتعمل أفلام آسف يعني مبتتباعش ديجيتال، طب أنت مابيعتش فيلمك ديجيتال، النهاردة إنت لما بتيجي تبيع ده بيعوضلك شيء من التكلفة، صح؟ أنت عملت فيلم ما اشتغلش جوا مصر في السينمات، وما اشتغلش في الخليج مجابش إيراد، ومبعتهوش ديجيتال، طب أنت هتقفل».

وأختتم السبكي تصريحاته قائلًا: «كانت الأول روتانا بتاخد، بطلت، روتانا موجودة وشغالة، دي عندها تراث السينما المصرية كله بتاعنا، كله! الوليد بن طلال، روتانا.. لأن هي أساسًا مبتشتريش بقالها كتير».