علي ماهر: جئت لاستكمال ما بدأه حسام حسن.. ومحمد صلاح الأفضل في تاريخ مصر

تحدث علي ماهر المدير الفني لـ منتخب مصر عقب تعيينه مديرًا فنيًا لـ الفراعنة خلفًا لـ العميد حسام حسن، ويبدأ مهمته بمباراة مالاوي يوم الجمعة المقبلة في الجولة الثالثة من التصفيات المؤهلة إلى كأس أمم إفريقيا 2027.

تصريحات علي ماهر

وقال علي ماهر في تصريحات مع الإعلامي سيف زاهر: أشكر سيادة الرئيس على دعمه لمشروع المدرب المصري الوطني وهذا حق مشروع للمدرب المصري لأن كل المدربين بيشقوا وبيتعبوا والدوري المصري دوري قوي، وفي الآخر أنا من المنتج ده، أنا طالع من جوه المنتج الجميل اللي معمول الدوري المصري.

وأضاف: أشكر حسام وإبراهيم حسن على ما قدموه للكرة المصرية وأنا جاي عشان أكمّل اللي عملوه ومصر تستاهل إننا ناخد بطولة واتنين وتلاتة وأنا جاي عشان ده.

واستكمل علي ماهر في تصريحاته: الواحد يبقى عنده هدف ويبقي عايز يوصله، والهدف ده بيجي أنك أنت بتتعبه وبتشقى وبتشتغل وبتعاول، وبتوقع وبتقوم وتعمل ستارت وتقوم.. ياما وقعت وياما قومت.. وهي دي الكورة، وهو ده الواحد متعود على الحياة صعبة، مفيش حاجة سهلة.

وأردف: عايز الناس كلها تبقا ملتفة حول منتخب مصر لأن المنتخب ده يستاهل إننا كلنا نبقا حواليه، معاه أحسن مجموعة لعيبة جات في تاريخ مصر موجودين، اللعيبة كلها لعيبة جامدة، ولعيبة محترمة ولعيبة جميلة كلهم، ولعيبة عايزة تعمل حاجة فعلًا لبلدها.

وأكد: عندنا أحسن لعيب جه في تاريخ مصر.. أحسن حاجة حصلت في تاريخ مصر، محمد صلاح، كلنا فخورين بيه، قدوة لكل اللعيبة، فإن شاء الله نعمل حاجة مع اللعيبة، نعمل حاجة محترمة وحاجة مختلفة بإذن الله.

واستمر في تصريحاته: بشكر المهندس هاني أبو ريدة.. وكل الناس المسؤولين عن الكورة بصراحة ناس كلها محترمة، ناس كلها بتتعب وناس كلها عايزة.. عايزة أحسن حاجة تعملها للبلد، فدي حقيقة فعلًا والموضوع سهل وبسيط، مفيش تعقيد فيه، ناس جميلة، ناس بسيطة، ناس بتعرف تفكر كويس، ناس عندها رؤية، عايزين يريحوك.. بيوفرولك مناخ جميل عشان تشتغل فيه، ودي نقطة مهمة جدًا.

وعن اختيار الجهاز المعاون، شدّد علي ماهر في تصريحاته: لما تيجي تختار حد يبقى ليه تأثير، مينفعش تختار واحد تجامله بيه، لأن بعد شوية.. أو بعد وقت هيبان السلبيات والإيجابيات.. فلو اختارت واحد بناء على مجاملة؛ هيبان بعد شوية إن السلبيات هتبقى كتير، فده نوع مهم جدًا لما تيجي تختار.. بتختار بناء على تأثيره في المكان؛ هو حد مؤثر ولا.. يعني حد هيطلع لك منتج ولا.. حد هيشتغل ويبقى قوي في المكان ولا لأ؟، فدي نقطة مهمة وعشان كده الناس كانت مريحة وسايباك.. لازم تجيب ناس مسؤولة، ناس عندها تأثير، ناس بتشتغل، ناس بتحب الشغل، ناس حياتها كلها قايمة على الشغل، فدي نقطة مهمة جدًا يعني.

وعن إلغاء منصب مدير المنتخب؟، أجاب علي ماهر قائلًا: ليه يبقى في وسيط ما منّي للمسؤول على طول؟ أحسن حاجة الوضوح، أنا اتكلمت مع هاني أبو ريدة في الجزئية دي وهو متفهم دي جدًا.