عضو اتحاد الكرة يكشف شروط عقد علي ماهر مع منتخب مصر.. وموقف بديل باسم علي

أكد مصطفى أبو زهرة عضو مجلس إدارة الاتحاد المصري لكرة القدم، أن عقد علي ماهر، المدير الفني الجديد لمنتخب مصر، يتضمن الشروط نفسها التي وُضعت في عقد حسام حسن، المدير الفني السابق، كما أكد أن اتحاد الكرة درس أكثر من اسم لتولي القيادة الفنية لـ الفراعنة.

تصريحات مصطفى أبو زهرة عضو مجلس إدارة اتحاد الكرة

وقال أبو زهرة، في تصريحات تليفزيونية: أي عقد لمدرب منتخب مصر بيكون مرتبطًا بالوصول إلى نصف نهائي كأس الأمم الإفريقية، عشان يستمر في تصفيات كأس العالم، وأي وصول لكأس العالم معناه استكمال المهمة في البطولة.

وواصل: دي نفس الشروط اللي اتعمل بيها عقد الكابتن حسام حسن، واتعملت للكابتن علي ماهر، لكن الراتب أقل شوية، ولسه اللجنة المختصة بتعمل العقد.

وعن أزمة باسم علي وعدم امتلاكه الرخصة التدريبية المطلوبة، قال: في اتحاد الكرة عندنا مبدأ إن المدير الفني بيختار جهازه بالكامل، والكابتن علي ماهر هو من سيختار بديل باسم علي.

وعن إمكانية تواجد محمد عبدالواحد قال: علي ماهر له حرية الاختيار.

وبشأن عدم عقد مؤتمر صحفي لتقديم علي ماهر، أوضح: مفيش وقت، لأنه جه تاني يوم وكان مطالب بإعلان القائمة، والوقت ماكنش مناسبًا لعقد مؤتمر صحفي.

وواصل: لو فيه حاجة تستدعي عقد مؤتمر صحفي بعد المباراتين هنعمله، ولو المدرب محتاج يقول حاجة إضافية هننظم مؤتمر، وإحنا ما بنتأخرش عن الإعلام.

وأكمل: أنا وهاني أبو ريدة وخالد الدرندلي سنرافق بعثة منتخب مصر في مالاوي لدعم اللاعبين والجهاز الفني.

وأفاد أبو زهرة: كان فيه أكثر من اختيار لتولي تدريب منتخب مصر، لكن ركزنا على الكابتن علي ماهر، ومش حابب أذكر أسماء تانية أو أقول اخترنا مين وليه ما اخترناش غيره وكان في 5 مدربين مرشحين.

واكد: فكرة التعاقد مع مدرب أجنبي ما جتش نهائي، وما اتطرحتش من الأساس، وإحنا تربيتنا إننا نفضل نطلع مدربين لكل الدول العربية والإفريقية، زي ما كنا بنعمل زمان.

وكشف: عقود المدربين واحترامها شيء مفروغ منه، والكابتن حسام حسن مستحقاته محفوظة، والعقد بيتم احترامه وسيحصل على الشرط الجزائي المقدر بـ 3 أشهر.

وعن بداية علي ماهر مهمته مع المنتخب، قال: الناس بترحب بالكابتن علي وجهازه، وهو نفسه حاسس بحجم المسؤولية، وربنا يعينه، وأنا حسيته مركز جدًا في شغله، وهو مدرب مر بتجارب كتير ومن الكفاءات المصرية.

وواصل: فيه ناس كتير بتتعاطف مع الكابتن حسام حسن، لكن مش رافضة الكابتن علي ماهر، والحمد لله هو اختيار كويس.

وطالب أبو زهرة الجماهير المصرية بمساندة المنتخب خلال المرحلة المقبلة، قائلًا: بطلب من كل المصريين إننا ندعم منتخب مصر، عندنا مدرب مصري وجهاز فني مصري، وعندنا لاعبين كبار، وعلى رأسهم محمد صلاح، وفيه جيل بيتم فيه إحلال وتجديد، وفي نفس الوقت مطلوب منه تحقيق نتائج، ودي معادلة صعبة جدًا.

وأتم: ممكن تتعاطف مع مدرب أو تختلف مع مدرب، لكن منتخب مصر مفيش خلاف على الوقوف معاه، مصر فوق الجميع، ودي بلدنا وإحنا خدامين ترابها، وتحت أمرها في أي مهمة.