كشف باسم علي، نجم النادي الأهلي الأسبق، كواليس استبعاده من الجهاز المعاون لعلي ماهر في منتخب مصر، بسبب عدم حصوله على الرخصة التدريبية المطلوبة.
اقرأ من المصدر
القاهرة 24
كشف باسم علي، نجم النادي الأهلي الأسبق، عن كواليس استبعاده من الجهاز المعاون لعلي ماهر في منتخب مصر، بسبب عدم حصوله على الرخصة التدريبية المطلوبة.
وقال باسم علي، خلال تصريحات تليفزيونية: كابتن علي ماهر كلمني الساعة 2 امبارح، واتفق معايا إننا نقعد مع بعض ونطلع على اتحاد الكرة، وده اللي حصل بالفعل، وروحنا والموضوع تم.
وأوضح: كنت المفروض أكون متواجد في كل الجلسات مع اتحاد الكرة، واتفقنا على كل حاجة تخص الاختيارات والقائمة، وبعدها روحت نظمت دنيتي ورتبت أموري على أساس وجودي مع الجهاز.
وأكمل: لكن قبل التمرين، الكابتن قالي إني مش هكون موجود بسبب معايير الكاف، وضرورة الحصول على الرخصة A، أنا معايا رخصتي D وC، ومستني الحصول على الرخصة B، والمفروض إنها تبدأ خلال شهرين.
واستكمل: اتصدمت من موضوع الرخصة، خصوصًا إنه اتقال لي قبل بداية التمرين، ومحدش من اتحاد الكرة كلمني أو بلغني بالموضوع قبل كده.
وأردف: لميت حاجتي وروحت لما علي ماهر بلغني إني مش موجود، ومكنش ينفع أنزل التمرين علشان الرخصة.
وأضاف: كان المفروض من بدري يعرفوني بموضوع الرخصة، ليه أجي وألم حاجتي؟ كنت بحضر نفسي أنزل التمرين، وعلي ماهر كان زعلان وهو بيقولي القرار.
وواصل: حضرت الغدا والمحاضرات في معسكر منتخب مصر، وتفاجأت قبل نزول التمرين، مظنش الموقف ده مر على حد قبل كده.
وأكمل: علي ماهر حاول يشوف لي حل قانوني، وقالي متزعلش، وأثق جدا في علي ماهر وهو أخ كبير لي.
وزاد: أولا وأخيرا أتمنى التوفيق لعلي ماهر مع منتخب مصر، فهو بمثابة أخ كبير لي قبل ما أكون في جهازه، وشرف لأي حد التواجد في منتخب مصر، وأتمنى التوفيق لعلي ماهر.
واختتم: ربنا دايمًا بيختار لي الأفضل وثقتي في ربنا كبيرة جدا، أنا عارف كابتن علي ماهر كويس، وبيشتغل 18 ساعة في اليوم.
