مصطفى شوبير يكشف كواليس تجديد عقده مع الأهلي حتى 2029

كشف مصطفى شوبير حارس مرمى فريق الكرة الأول بالنادي الأهلي كواليس تمديد عقده مع الأحمر حتى عام 2029، وذلك خلال الفترة الماضية.

تصريحات مصطفى شوبير

وقال مصطفى شوبير في تصريحات للموقع الرسمي للنادي الأهلي: في النادي الأهلي إحنا بنصنع التاريخ، إحساس حلو جدًا إنك تكون مكمل في بيتك، ده حلم من أحلام الطفولة طبعًا الواحد إنه يلعب في النادي الأهلي، من أول ما بنكون موجودين في قطاع الناشئين بيبقى هدفنا نوصل للفريق الأول، ففكرة إنك بقيت في الفريق الأول وبتشارك بشكل أساسي والنادي بيجددلك، وقد إيه إنت مهم للنادي، دي حاجة بتخلي الواحد مبسوط وفخور.

وأضاف: أنا كواحد من أبناء النادي، الناس بتبصلي بصفة مختلفة، بيبقوا عايزين مني حاجة مميزة وده طبيعي، فرصة الرحيل صعبة، ده بيتي في الأول والآخر، واللي النادي عايزه هو اللي بيمشي، وبحترم وجهة نظر النادي.

وأشار مصطفى شوبير في تصريحاته: كل تركيزنا السنة دي إننا نرجع لمنصة التتويج تاني، ونعوض جمهور الأهلي عن السنة اللي فاتت اللي كانت سنة وحشة جدًا، المفاوضات كان فيها أريحية لأني كده كده هجدد، ده أمر مفروغ منه، مفيش حد يقدر يفرض على النادي حاجة، وجددنا بالاتفاق اللي إحنا متفقين عليه عادي، من غير شروط جزائية ولا أرقام مبالغ فيها.

وأضاف: الناس بتقول كان فيه مماطلة والوقت بيطول وده مش طبيعي من ولاد النادي.. كلامهم صح 100% بس إحنا مماطلناش أصلًا، النادي بيحبك تكون مركز في الملعب فبيأجل الكلام لغاية بعد الماتشات، حتى لو الموضوع أخد شوية وقت، ده مش معناه إنك مش هتجدد، أنت كده كده هتجدد.

وأفاد: حسين الشحات جدد في شهر 7 وعقده كان خلصان من شهر 1، ومحمد هاني برضه نفس الكلام، ده بيأكد إن ولاد النادي مكملين بس الموضوع بياخد وقته في الكلام الرايح والجاي.

وأكد مصطفى شوبير: الجمهور ليه فضل كبير عليا، الناس حتى وأنت مابتلعبش بتساندك وبتدعمك وعايزينك تشارك أكتر، لما نزلت بوست بعد التجديد قلت للنادي وجمهوره لأن ده المكان اللي عملني وليه فضل عليا، طول ما أنت بتأدي والجمهور شايفك بتدي 100% للنادي، هيحبك أكتر وأكثر.

واستمر: سياسة النادي ناجحة جدًا إنك تحافظ على قوام الفريق وتقدر اللعيبة ماليًا بشكل كويس، زي عمر معوض ومحمد عبد الله، لما اللعيب يحس بتقدير من بيته، هتمشي خطوة هيمشيلك 10 خطوات.

وشدّد: هدفنا الأساسي ناخد بطولة الدوري ونكسب ونجمع أكبر عدد نقط، وناخد كل البطولات دوري، إفريقيا، كأس، أي بطولة هندخلها لازم ننافس عليها وناخدها إن شاء الله، ده الطبيعي بتاع الأهلي وده حق الجمهور علينا.

وزاد مصطفى شوبير في تصريحاته: سر النجاح هو إن الحالة الجماعية وأوضة اللبس تكون كويسة، حسين لما عمل جول لإمام، وإمام بينافس على الهداف، وبن شرقي بيدي الجايزة لأفشة.. الحاجات دي هي أساس النجاح مش بس قدام الناس، دي موجودة في أوضة اللبس كمان.

وتابع: في حراسة المرمى بنفهم بعض بالتواصل أكتر، في ماتش برشلونة، الشناوي شاورلي في الشوط الأول على لعيب بيشوط كده، ولما جت ضربة جزاء شاورلي على الزاوية اللي بيشوط فيها، في الآخر ده توفيق من ربنا وشطارة منه، وإحنا بنعمل كده عشان نساعد الفريق.

وعن ذكرياته في كأس العالم، صرّح شوبير: كنت مبسوط جدًا بعد ماتش الأرجنتين، مش بس فكرة إني صديت ركلة جزاء من ميسي، على قد ما هي فكرة إنك من القليلين اللي صدوا ضربتين جزاء في نسخة واحدة من كأس العالم، دي حاجة بتكتب في التاريخ، واللعب في الأهلي بيخليك متعود على الأجواء دي والمستويات العالية.

وتابع: نوير أسطورة في حراسة المرمى وغيّر ستايل الحراسة، إنك تشوفه في الملعب وإنت عندك 20 سنة في كاس عالم الأندية دي حاجة كبيرة جدًا.

وأوضح: مرحلة الناشئين في فرع مدينة نصر دي حاجة مميزة في قلبي، مشوار وتمرين كل يوم وذكريات كتير، نصيحتي لقطاع الناشئين واللعيبة الشباب زي حمزة علاء اللي طالع وبيمثلنا بشكل مشرف، اتمرن كويس، ركز، وربنا هيكرمك وتطلع الفريق الأول، ودي بتبقى البداية الحقيقية.

وأتم مصطفى شوبير تصريحاته بتوجيه رسالة لـ جمهور الأهلي قائلًا: أنتوا الدعم الأول لينا، بنكون مبسوطين جدًا بوجودكم في المدرجات وبأعداد كبيرة، كل اللي بطلبه من جمهور الأهلي مايبطلوش دعم زي ما بيعملوا دايما، وعلى شعارهم عالحلوة والمرة معاه، بنوعدكم إننا هنقدم كل اللي نقدر عليه عشان ناخد كل البطولات.