محمد فراج عن حكاية لعبة جهنم: من أعنف القضايا في مصر.. وكان تحدٍ تفاصيله قاسية على الجمهور

تحدث الفنان محمد فراج، عن تقديمه بطولة حكاية لعبة جهنم، ضمن سلسلة القصة الكاملة للمنتج مجدي الهواري، والتي تناولت القضية المعروفة إعلاميًا بجريمة شبرا الخيمة.

وقال محمد فراج، في تصريحات تلفزيونية: الحمد لله النجاح كرم وفضل من ربنا كبير أوي، الموضوع كان تحدي أوي أنك تاخد قضية من أشهر وأعنف القضايا في مصر في السنوات الأخيرة، لما تتحول لعمل فني الجريمة فيها بتتكلم عن إيه؟، وشرحها وطريقة التعامل في الجريمة بين الضحية والأشخاص التانيين، كل دي تفاصيل ممكن تبقى قاسية على الجمهور.

وأضافت محمد فراج: دي قضية الضحية فيها كان طفل فكان تقيل أوي وقعها خاصة لما تتقدم بصدق وصح، أكيد هتفكر الناس بشكل أو بآخر بشوية معاناة نفسية، في نفس الوقت بنوصل رسائل مهمة للناس كلها أن على الأقل لو حاجة حصلت غلط ناخد بالنا.

واستكمل فراج: كلنا عرفنا القضية الحقيقية وقت وقوعها، ولكني مكنتش مُلم بكل التفاصيل ولما اتعرض عليا المسلسل طبعًا مخدتش وقت خالص علشان آخد القرار، لأن دي حاجة بالنسبة ليا كممثل فيها تحدٍ كبير.

أبطال حكاية لعبة جهنم

يشارك في بطولة الحكاية إلى جانب محمد فراج كل من عمر رزيق، منذر مهران، كريمة منصور، وياسر عزت، والعمل من تأليف نجلاء الحديني، وإخراج إسلام خيري، وإنتاج وإشراف مجدي الهواري، وتتكون لعبة جهنم من 3 حلقات، وهي الحكاية الأولى من مشروع القصة الكاملة، الذي يعتمد على تقديم قصص مستقلة مستوحاة من أحداث واقعية.