بكسب 30 ألف جنيه شهريًا.. ننشر أقوال البلوجر علياء قمرون في اتهامها بنشر مقاطع خادشة للحياء العام | خاص

كشفت التحقيقات تفاصيل القبض على البلوجر علياء قمرون، بعد نشرها مقاطع فيديو تضمنت ألفاظًا وإيحاءات جنسية خادشة للحياء العام، وتتعارض مع القيم المجتمعية.

وحصل القاهرة 24 على نص التحقيقات وجاءت أقوالها كالآتي:

س: ما قولك فيما هو منسوب إليكِ من أنكِ متهمة بالاعتداء على القيم والمبادئ للمجتمع المصري، بأن نشرت مقاطع مرئية ومسموعة تحتوي على بعض الألفاظ الخارجة والإيحاءات الخادشة للحياء، والمبينة بالأوراق، وذلك من خلال حساباتكِ على مواقع التواصل الاجتماعي (فيسبوك، وتيك توك، وإنستجرام)، على نحو يجافي القيم المجتمعية المصرية وأخلاق المجتمع المصري، على النحو المبين بالأوراق؟

س: ما قولك فيما هو منسوب إليكِ من أنكِ متهمة بإنشاء وإدارة حساباتكِ على مواقع التواصل الاجتماعي محل الاتهام الأول، وذلك لارتكاب جريمة معاقب عليها قانونًا، وهي نشرك مقاطع مرئية ومسموعة بها أفعال مخلة بالحياء، على النحو المبين بالأوراق؟

س: ما قولك فيما هو منسوب إليكِ من أنكِ متهمة بارتكاب أفعال مخلة بالحياء، وقمتِ بتوثيقها عبر مقاطع مرئية ومسموعة، وقمتِ بنشرها على مواقع التواصل الاجتماعي محل الاتهام الأول، على النحو المبين بالأوراق؟

س: ما ظروف نشأتك الاجتماعية؟

ج: أنا اتولدت في قرية تلا بمحافظة المنوفية، وكنت عايشة مع والدي ووالدتي لحد ما اتطلقوا، وكل واحد فيهم اتجوز، وماما اتجوزت وعاشت في أشمون، وخلفت 4 عيال، وهما إخواتي من الأم، لكن أنا ماليش علاقة بيهم.

وأبويا اتجوز 3 مرات بعد ما طلق أمي، وكل واحدة فيهم كانت بتيجي تعيش معانا شوية، وبعدها تطلق وتمشي، لأن أبويا طبعه وحش وكان بيضربهم، لكن مراته الأخيرة هي اللي كملت معاه، وبقالها حوالي 9 سنين عايشة معاه، وخلفت 3 أولاد، وهي حامل في الرابع دلوقتي.

وإحنا ظروفنا في البيت على قدها شوية، أقل من المتوسطة يعني، وأنا دخلت مدرسة وخدت دبلوم صنايع قسم زخرفة في مدرسة تلا الصناعية بنات.

ولما خلصت تعليمي، اشتغلت عاملة نظافة في جامعة طنطا، لأني كنت عايزة أبعد عن أبويا، لأن أسلوبه كان وحش معايا، فروحت عشت في طنطا حوالي سنة ونص تقريبًا.

وأنا هناك في طنطا، كنت ساعات ببيع توك ومناديل جنب شغلي في النظافة، فقابلت واحدة اسمها حسناء، واسمها «تونة» على تيك توك، وكان معاها موبايل آيفون، ولقيتها جت صورتني وقالت إن كل اللي اتقال إشاعات، وإن أنا وعلياء إخوات.

وروحت أنا مغنية أغنية «قمرون سيدنا النبي»، وراحت حسناء منزلة الأغنية على تيك توك، وتاني يوم لقيت الناس جايين وعايزين يتصوروا معايا، وقالولي: «إنتِ بقيتي تريند على تيك توك».

وأنا وقتها كان عندي أكونت على تيك توك، بس صغير ومكنش حد يعرفه، وفي الوقت ده صاحبتي حسناء قالتلي اطلعي لايفات واطلعي مع المشاهير.

وطلعت جولة على تيك توك مع شاكر، وفي الأكونت بتاعي زاد عدد المتابعين أكتر، وبقت بيجيلي فلوس كويسة، حوالي 30 ألف جنيه في الشهر تقريبًا، وكنت بطلع لايف كل يوم تقريبًا.

وأنا كل ده كنت عايشة لوحدي في طنطا، وكان حصلت مشكلة في سنة 2025 واتقبض عليا، وخرجت بعدها بحوالي شهرين حبس احتياطي، ومعرفش حصل فيها إيه لحد دلوقتي.

ولما خرجت من السجن، بدأت أبعد عن تيك توك شوية، وأبعد عن اللايفات، واتجهت إني أبيع توك وحاجات كده، لحد ما اتعرفت على أخت حمادة من حوالي شهرين، وهي قالتلي إن أخوها حمادة علي عايز يتجوز، وعرفتنا على بعض، وفعلًا اتجوزنا وقعدنا في شقة هو كان مأجرها في السادات بمحافظة المنوفية، وبعدها بقى فيه قلق بسبب الفيديوهات بتاعتنا، فهو حب إن إحنا نمشي من السادات ونروح نقعد في حلوان في بيت أخوه، لحد ما نجيب شقة في نفس البيت بتاع أخوه.

وفعلًا روحنا حلوان لحد 31 أكتوبر 2026، اتفقنا مع عربية تيجي تاخد العفش بتاعي من الشقة في السادات وتجيبه حلوان.

ولما العربية وصلت، حمادة نزل يجيب العفش من تحت، ولما حمادة نزل، لقيت بعدها على طول الحكومة داخلين عليا البيت، فأنا اديتهم 3 موبايلات وفلوس 7 آلاف و970 جنيهًا.

وجابوني النهاردة على هنا، وده كل اللي حصل.