ننشر أقوال البلوجر علياء قمرون في اتهامها بنشر مقاطع خادشة للحياء | خاص

كشفت التحقيقات تفاصيل القبض على البلوجر علياء قمرون، بعد نشرها مقاطع فيديو تضمنت ألفاظًا وإيحاءات جنسية خادشة للحياء العام، وتتعارض مع القيم المجتمعية.

وحصل القاهرة 24 على نص التحقيقات، التي أنكرت خلالها علياء قمرون الاتهامات المنسوبة إليها، وردت على أسئلة المحققين بشأن نشر مقاطع مرئية ومسموعة تتضمن ألفاظًا خارجة وإيحاءات خادشة للحياء، عبر حساباتها على مواقع فيسبوك وتيك توك وإنستجرام، بقولها: «محصلش».

س: ما قولك فيما هو منسوب إليكِ من أنكِ متهمة بالاعتداء على القيم والمبادئ للمجتمع المصري، بأن قمتِ بنشر مقاطع مرئية ومسموعة تحتوي على بعض الألفاظ الخارجة والإيحاءات الخادشة للحياء، والمبينة بالأوراق، وذلك من خلال حساباتكِ على مواقع التواصل الاجتماعي (فيسبوك، وتيك توك، وإنستجرام)، على نحو يجافي القيم المجتمعية المصرية وأخلاق المجتمع المصري، على النحو المبين بالأوراق؟

س: ما قولك فيما هو منسوب إليكِ من أنكِ متهمة بإنشاء وإدارة حساباتكِ على مواقع التواصل الاجتماعي محل الاتهام الأول، وذلك لارتكاب جريمة معاقب عليها قانونًا، وهي قيامكِ بنشر مقاطع مرئية ومسموعة بها أفعال مخلة بالحياء، على النحو المبين بالأوراق؟

س: ما قولك فيما هو منسوب إليكِ من أنكِ متهمة بارتكاب أفعال مخلة بالحياء، وقمتِ بتوثيقها عبر مقاطع مرئية ومسموعة، وقمتِ بنشرها على مواقع التواصل الاجتماعي محل الاتهام الأول، على النحو المبين بالأوراق؟

س: ما ظروف نشأتك الاجتماعية؟

ج: أنا اتولدت في قرية تلا بمحافظة المنوفية، وكنت عايشة مع والدي ووالدتي لحد ما هما اتطلقوا، وكل واحد فيهم اتجوز، وماما اتجوزت وعاشت في أشمون، وخلفت 4 عيال، وهما إخواتي من الأم، لكن أنا ماليش علاقة بيهم.

وتابعت: أبويا اتجوز 3 مرات بعد ما طلق أمي، وكل واحدة فيهم كانت بتيجي تعيش معانا شوية، وبعدها تطلق وتمشي، لأن أبويا طبعه وحش وكان بيضربهم، لكن مراته الأخيرة هي اللي كملت معاه، وبقالها حوالي 9 سنين عايشة معاه، وخلفت 3 أولاد، وهي حامل في الرابع دلوقتي.

وأكملت: وإحنا ظروفنا في البيت على قدها شوية، أقل من المتوسطة يعني، وأنا دخلت مدرسة وخدت دبلوم صنايع قسم زخرفة في مدرسة تلا الصناعية بنات.

وواصلت: ولما خلصت تعليمي، اشتغلت عاملة نظافة في جامعة طنطا، لأني كنت عايزة أبعد عن أبويا، لأن أسلوبه كان وحش معايا، فرُحت عشت في طنطا حوالي سنة ونص تقريبًا.

وأكملت: أنا هناك في طنطا، كنت ساعات ببيع توك ومناديل جنب شغلي في النظافة، فقابلت واحدة اسمها حسناء، واسمها تونة على تيك توك، وكان معايا موبايل آيفون، ولقيتها جت صورتني وقالت إن كل اللي اتقال إشاعات، وإن أنا وعلياء إخوات.

واستطردت: ورُحت أنا مغنية أغنية قمرون سيدنا النبي، وراحت حسناء منزلة الأغنية على تيك توك، وتاني يوم لقيت الناس جايين وعايزين يتصوروا معايا، وقالولي: إنتِ بقيتي تريند على تيك توك.

وتابعت: وأنا وقتها كان عندي أكونت على تيك توك، بس صغير ومكنش حد يعرفه، وفي الوقت ده صاحبتي حسناء قالتلي اطلعي لايفات واطلعي مع المشاهير.

وأكمل: وطلعت جولة على تيك توك مع شاكر، وفي الأكونت بتاعي زاد عدد المتابعين أكتر، وبقيت بيجيلي فلوس كويسة، حوالي 30 ألف جنيه في الشهر تقريبًا، وكنت بطلع لايف كل يوم تقريبًا.

وأوضحت: وأنا كل ده كنت عايشة لوحدي في طنطا، وكان حصلت مشكلة في سنة 2025 واتقبض عليا، وخرجت بعدها بحوالي شهرين حبس احتياطي، ومعرفش حصل فيها إيه لحد دلوقتي.

ولفتت: لما خرجت من السجن، بدأت أبعد عن تيك توك شوية، وأبعد عن اللايفات، واتجهت إني أبيع توك وحاجات كده، لكن لحد ما اتعرفت على أخت حمادة من حوالي شهرين، وهي قالتلي إن أخوها حمادة علي عايز يتجوز، وعرفتنا على بعض، وفعلا اتجوزنا من حوالي 15 يوم تقريبًا، وقعدنا في شقة هو كان مأجرها في السادات بمحافظة المنوفية، وبعدها بقى فيه قلق بسبب الفيديوهات بتاعتنا، فـ هو حب إن إحنا نمشي من السادات ونروح نقعد في حلوان في بيت أخوه، لحد ما نجيب شقة في نفس البيت بتاع أخوه.

ووواصلت أمام جهات التحقيق: فعلًا جينا هنا حلوان من يومين، لحد 31 أكتوبر 2026، اتفقنا مع عربية تيجي تاخد العفش بتاعي من الشقة في السادات وتجيبه هنا حلوان.

وتابعت: لما العربية وصلت، حمادة نزل يجيب العفش من تحت، ولما حمادة نزل، لقيت بعدها على طول الحكومة داخلين عليا البيت، فأنا اديتهم 3 موبايلات وفلوس 7 آلاف و970 جنيهًا، وجابوني النهارده على هنا، وده كل اللي حصل.