والدته قالت إنه المسؤول عن الكاميرات.. ننشر أقوال المجني عليها في واقعة تركيب كاميرا مراقبة داخل غرفتها بالتجمع | خاص

كشفت التحقيقات تفاصيل واقعة اتهام أحد الأشخاص بوضع كاميرا للمراقبة، داخل غرفة سكن فتاة بالتجمع الخامس، في القاهرة.

تفاصيل واقعة تركيب كاميرا مراقبة داخل غرفتها بالتجمع

وحصل القاهرة 24 على أقوال المجني عليها أمام جهات التحقيق كالتالي: 

س: مما تتضررين؟

ج: اللي حصل إن أنا من سكان الإسكندرية وجيت القاهرة من حوالي سنة وكنت مأجرة غرفة في فيلا بالتجمع الخامس - القاهرة، وأنا مأجرة الغرفة دي من والدة المتهم وكنت بدفع لها في الشهر 3500 جنيه، والفيلا دي متقسمة أوض وفيه حوالي 40 بنت مأجرين أوض زيي كده.

ولما جينا في رمضان اللي فات أنا تعبت وجالي ظروف صحية ورجعت الإسكندرية وسيبت الأوضة بس دافعه إيجارها والأوضة مقفولة ومعايا مفتاحها عادي، وفضلت قاعدة في إسكندرية وجيت يوم 29/ 3 / 2026، ولما وصلت دخلت عشان ألم حاجتي، لكني فضلت قاعدة فيها، ويوم 31 / 3 / 2026 الساعة 4 الفجر لقيت زي نور كده ولما بصيت لقيت إن فيه كاميرا لونها أبيض محطوطة على شباك الأوضة بتاعتي وباصه على الأوضة.

وساعتها روحت طالبة النجدة على طول ولما جاتلي شافوا الموضوع وشافوا الكاميرات والـ DVR ولقوا إن فعلا الكاميرا بتصور من أوضتي ولما راجعنا الفيديوهات لقيت إني ظاهرة فيها، ولما سألنا الست اللي أنا مأجرة منها قالت إنها متعرفش حاجة وإن اللي بيتابع موضوع الكاميرات ده ابنها وساعتها روحنا القسم وعملت المحضر وده كل اللي حصل.

س: متى وأين حدث ذلك؟

ج: الكلام ده حصل 31/ 3 / 2026 حوالي الساعة 4 الفجر في الحي الرابع - التجمع الخامس - القاهرة.

س: من كان رفقتك آنذاك ؟

ج: أنا كنت لوحدي في الأوضة بتاعتي.

س: مع من تعاملت بشأن إيجار تلك الغرفة؟

ج: مع والدة المتهم بس أنا مش عارفه اسمها إيه.

س: ملك من ذلك العقار؟

ج: المتهم وأهله هما كلهم قاعدين في البيت ده.

س: هل من ثمة إدارة مسؤولة عن تأجير ذلك العقار؟

ج: لأ، مفيش إدارة أو حاجة، هما مقسمين البيت وبيأجروا من نفسهم كده.