سهير رمزي عن الجيل الجديد: توقفت عند منة شلبي ومنى زكي.. والدراما التركية أصبحت أقوى| خاص

كشفت الفنانة سهير رمزي عن رأيها في فنانات الجيل الجديد، موضحة أنها لا تتابع كثيرا من الوجوه الشابة حاليا، مشيرة إلى أن منة شلبي ومنى زكي هما آخر فنانتين لفتتا انتباهها.

وقالت سهير رمزي في تصريحات خاصة لـ القاهرة 24: أنا متوقفة عند منة شلبي ومنى زكي، إنما الجداد دول أنا ما تابعتش حد فيهم، ومحدش فيهم لفت نظري.

وعن غيابها عن الأعمال الفنية، أكدت سهير رمزي أنها بخير، وأن ابتعادها عن الساحة لا يعني اعتزالها، قائلة: أنا كويسة الحمد لله، مفيش أي حاجة، ما بغيبش ولا حاجة، الحياة بتاخد الواحد واليوم بقى قصير والحياة مليانة حاجات كتير، لو لاقيت حاجة تناسبني أكيد هعملها.

وأوضحت سهير رمزي أنها تبحث عن عمل فني متكامل يمثل عودة قوية لها، وليس مجرد ظهور على الشاشة، قائلة: لما هلاقي النص الكويس اللي أقدر أقدمه، الحاجة الحلوة اللي أقدر أرجع بيها رجعة حلوة، هي مش مجرد أتواجد وخلاص، ده تواجد بلا أي فائدة.

وأكملت: الرواية حلوة، كتابة حلوة، شخصية حلوة جديدة عليا، شخصية تستفزني أني أنزل وأعملها، في الجو المحيط اللي إحنا فيه دلوقتي، إنتاج كويس، يعني كل العوامل اللي ممكن توفر لي الحاجة اللي ممكن تريحني.

وأكدت أنها لا تبحث حاليا عن الانتشار أو الظهور لمجرد التواجد، مشيرة إلى أنها تتلقى العديد من الدعوات للتكريم والمشاركة في المهرجانات، لكنها تفضل أن يكون ظهورها مرتبطا بعمل فني.

سهير رمزي عن أم البنات: الإنتاج والإخراج ما ساعدوش العمل

وتحدثت سهير رمزي عن آخر أعمالها أم البنات، موضحة أن العمل كان يمثل عودة جيدة لها، لكنها لم تكن راضية عن النتيجة النهائية بسبب بعض العوامل الإنتاجية والإخراجية.

وقالت: وقتها كان حلو وكويس وكنت ملتزمة ومحجبة، وقدرت أقدم عمل إلى حد ما عجب الناس وكان رجوع ليا كويس، أنا آخر حاجة عملتها كانت ليل أم البنات، رواية كانت حلوة وكتابة كانت حلوة، بس للأسف الشديد الإنتاج كان مش مساعدني في حاجات كتير، والإخراج كمان.

وأضافت: العمل ما طلعش بالشكل اللي أنا كنت حاطاه في ذهني، زي ما قرأت وشفت في الورق، اتنفذ بطريقة مش اللي أنا كنت عايزاها، قلت مش هخش عمل إلا لما يكون إنتاجيا صح وإخراجيا صح، وكل العوامل متوفرة إن العمل يكون صحيح ومعاك ورق حلو.

سهير رمزي: الدراما التركية فاقت

وأبدت سهير رمزي رأيها في مستوى الدراما التركية، مؤكدة أنها ترى أنها أصبحت أقوى من العديد من الأعمال المقدمة حاليا، مشيدة بجودة التمثيل والموضوعات وطريقة تقديم صورة تركيا.

وقالت: أنا شايفة إن مستوى المسلسلات التركي بقى أقوى من أي مسلسلات بتتعمل، أنا بتفرج على مسلسلات تركي فيها شيء جميل ومواضيع حلوة وممثلين هايلين، مضيفة: ناس بتوري بلدها بشكل حلو.